Fashola ansa qweshion left, right and centre from Senators during ministerial screening

Nigeria former minister of power, work and housing Babatunde Fashola say, di towns of Michika and Madaghali for Adamawa state no get light sake of say some members of Nigeria military blow up di power station for di areas as part of dia war strategy to fight Boko Haram.

Oga Fashola tok dis one as im dey ansa qweshion from Senator Isiaku Abbo wey dey represent Adamawa north wen bin wan know why some big towns for in state like Michika and Madagali still no dey for national grid since afta Boko haram attack di area.

For im response to Senator Teslin Kolawole Folarin, wey say in dey disappointed say dem no fit finish Lagos to Ibadan express way inside four years, Fashola say di problem wey Lagos to Ibadan express way get na di same problem of funding wey all di roads projects for Nigeria get.

E say no be say dem bin no wan do di road, but dem gatz to choose due to lack of moni.

E also say anoda challenge be say di protocol to get moni from public private partnership (PPP) na long one and e no easy to show result inside four years.

More dan 20 senators signify interest to ask Fashola qweshion on Monday wen im appear for senate for di continuation of di ministerial screening.

Di senate don dey screen di nominees since last week afta President Muhammadu Buhari send di list give dem, but plenty pipo bin don dey tok-tok say dem no dey ask di nominees dem beta qweshion.

Monday own show say no be business as usual afta Senate President Ahmed Lawan tok say im get 28 lawmakers ontop im list wey wan ask Fashola qweshion about im four years as minister.

Di Former minister wey list some of im achievement as minister say im bin recover 720 abandoned containers wit transmission equipment inside wen im become minister for 2015.

According Fashola di containers wey belong to di federal republic of Nigeria bin abandon for Nigeria Ports Authorities for almost ten years.

Fashola add say im later distribute di equipment to more dan 100 substations for different parts of di kontri. E say dem don complete some of di substations before im leave office.

Anoda nominee wey face di lawmakers on Monday na sister of di former Senate President Gbemi Saraki, but di senators no grill am as dem ask her to “take a bow and go.”

Leave a Reply

Your email address will not be published.

This site uses Akismet to reduce spam. Learn how your comment data is processed.