Di Islamic Movement of Nigeria don tok say eleven of dia members don die and 30 odas wunjure on Monday as dem clash wit Police for Abuja.
Di Muslim Shia group tok say all di gbege happun as police begin shoot dem on top protest wey dem dey do on Monday.
But for statement wey Police release for evening of same day, dem confam say Deputy Commissioner of Police Usman Umar die inside di ‘violent protest’ wey di ‘heavily armed’ followers of El-Zakzaky do.
Members of di Muslim Shia movement tok say dem dey protest to call for di release of dia leader Ibrahim El-Zakzaky wey Nigerian authorities don detain since 2015.
Di Police say dem don arrest fifty-four (54) suspects wey get hand for di incident.
E no dey clear dis pipo na part of di ‘over three thousand (3000) El-Zakzaky followers’ wey Police say dem count on di 22 July protest.
Two Assistant Superintendents of Police bin wunjure for di clash.
According informate wey Police bin release earlier in di day, di clash happun for di Central Business District (CBD) and Three Arms Zone for Abuja and dem warn citizens to avoid di areas.
By Monday evening, di Inspector General of Police Mohammed Adam don follow meet with President Muhammadu Buhari ontop di mata. Afta di meeting Adamu follow tori pipo tok wia im tell dem say di President don order am to provide security for all Nigerians.
Tori pipo Channels Television dey report say stray bullet hit one of dia journalist wey dey cover di protest.
On 21 July, di Islamic group tell BBC say dem no gree say di mata of dia leader dey di hand of Nigeria court, but instead e dey di hand of di kontri leader, Muhammadu Buhari.
Dis na afta one earlier statement from di president wey draw ear give di group to wait for court judgment on El-Zakzaky mata and stop to dey use violence and road blocking to protest.
Amnesty International don call on di Nigeria Police say make dem no too dey use force against di Shiite Islamic Movement.